गडचिरोली:
गडचिरोली जिल्हा माओवादमुक्त करण्याच्या दिशेने पोलिसांनी आणखी एक मोठे यश संपादन केले आहे. ‘ऑपरेशन अंतिम प्रहार’ अंतर्गत आत्मसमर्पण केलेल्या माओवाद्यांनी दिलेल्या अत्यंत गोपनीय माहितीच्या आधारे, गडचिरोली पोलीस दलाने बिनागुंडा जंगल परिसरात धडक कारवाई करत माओवाद्यांचा शस्त्रनिर्मिती कारखाना उद्ध्वस्त केला आहे. माओवाद्यांनी घातपाती कारवायांसाठी जमिनीखाली पुरून ठेवलेले मोठ्या प्रमाणावरील शस्त्र व स्फोटक साहित्य पोलिसांनी घटनास्थळीच नष्ट केले.
आत्मसमर्पित माओवाद्यांच्या माहितीवरून कारवाई
दिनांक १६ मे २०२६ रोजी ‘ऑपरेशन अंतिम प्रहार’ अंतर्गत काही माओवाद्यांनी गडचिरोली पोलिसांसमोर आत्मसमर्पण केले होते. पोलिसांच्या सखोल चौकशीदरम्यान, या माओवाद्यांनी बिनागुंडा पोलीस मदत केंद्राच्या हद्दीतील जंगलात शस्त्रनिर्मितीचे कारखाने आणि इतर घातक साहित्य लपवून ठेवल्याची कबुली दिली.या माहितीच्या आधारे, गडचिरोलीचे पोलीस अधीक्षक श्री. एम. रमेश यांच्या मार्गदर्शनाखाली २१ मे २०२६ रोजी विशेष अभियान पथक (C-60) आणि प्राणहिता यांच्या संयुक्त ६ तुकड्या तसेच बीडीडीएसच्या (बॉम्ब शोधक व नाशक पथक) २ तुकड्यांना शोध मोहिमेसाठी रवाना करण्यात आले होते.
जंगलाला वेढा आणि साहित्य जप्त
२२ मे २०२६ रोजी बिनागुंडाच्या उत्तरेकडील जंगल परिसरात सुरक्षा दलांनी वेढा घातला. बीडीडीएसच्या जवानांनी जंगलाची कसून तपासणी केली असता, जमिनीखाली लपवलेले खालील साहित्य हस्तगत करण्यात आले:
शस्त्रनिर्मिती यंत्रे: एक लेथ मशीन, ग्राइंडींग व ड्रिलींग मशीन, जीग सॉ मशीन, प्रेशर पंप.
युद्ध साहित्य: बिजीएल (BGL) पाईप्स, १२ बोअर पाईप्स.
वीज व ऊर्जा उपकरणे: इन्व्हर्टर, जनरेटर, बॅटरी, सोलर पॅनल.
इतर साहित्य: २० फुटी फुटबॉल पाईप इत्यादी.सुरक्षा दलांना मोठा धोका पोहोचवण्यासाठी आणि आगामी निवडणूक किंवा नक्षल सप्ताहादरम्यान घातपात घडवण्यासाठी हे साहित्य लपवून ठेवण्यात आले होते. वरिष्ठांच्या सूचनेनुसार हे सर्व साहित्य जवानांनी घटनास्थळावरच नष्ट केले.
वरिष्ठ अधिकार्यांच्या नेतृत्वात मोहीम यशस्वी
सदरची धडक कारवाई पोलीस अधीक्षक श्री. एम. रमेश, अपर पोलीस अधीक्षक (अभियान) श्री. कार्तिक मधिरा, अपर पोलीस अधीक्षक (प्रशासन) श्री. गोकुल राज जी., आणि पोलीस उप-अधीक्षक (अभियान) श्री. विशाल नागरगोजे यांच्या थेट मार्गदर्शनाखाली पार पडली. या धाडसी कामगिरीबद्दल पोलीस अधीक्षक श्री. एम. रमेश यांनी मोहिमेत सहभागी सर्व जवानांचे जाहीर कौतुक केले आहे.
