आलापल्ली (विशेष प्रतिनिधी):
महावितरण कंपनीकडून सध्या सर्वत्र बसविण्यात येत असलेल्या नवीन स्मार्ट मीटरमुळे सर्वसामान्य नागरिक, गरीब शेतकरी कमालीचे त्रस्त झाले असून, या मीटरमुळे वीज बिलात अनपेक्षित वाढ होत असल्याच्या तक्रारी वाढल्या आहेत. या पार्श्वभूमीवर, आलापल्ली विभागातील नवीन स्मार्ट मीटर तात्काळ काढून त्याऐवजी पूर्वीचेच जुने मीटर पुन्हा बसविण्यात यावेत, अशी मागणी शिवसेना (उद्धव बाळासाहेब ठाकरे) पक्षाचे जिल्हा प्रमुख (अहेरी विधानसभा क्षेत्र) श्री. दिलीपभाऊ सुरपाम यांच्या नेतृत्वात करण्यात आली आहे. या संदर्भात आज, ८ जुलै २०२६ रोजी महावितरणच्या आलापल्ली विभागाच्या कार्यकारी अभियंत्यांना एक लेखी निवेदन सादर करण्यात आले.यावेळी निवेदन देताना शिवसेना अहेरी जिल्हाप्रमुख मिंटू सय्यद, उपतालुका प्रमुख रुपेश बंदेला, तसेच खंदे शिवसैनिक संतोष अग्रवाल, अक्षय तुंबडे, नंदकिशोर मानकर आणि परशुराम गंजीवार यांच्यासह पक्षाचे इतर पदाधिकारी व कार्यकर्ते प्रामुख्याने उपस्थित होते.
६ तालुक्यांतील जनतेची तक्रार; आंदोलनाचा इशारा
शिवसेना अहेरी विधानसभा कार्यालय, आलापल्ली येथे अहेरी, भामरागड, मुलचेरा, एटापल्ली, चामोर्शी आणि सिरोंचा या सहा तालुक्यांतील नागरिकांनी स्मार्ट मीटरबाबत मोठ्या प्रमाणावर तक्रारी नोंदविल्या आहेत. या तक्रारींची गंभीर दखल घेत जिल्हाप्रमुख दिलीपभाऊ सुरपाम व उपस्थित पदाधिकाऱ्यांनी महावितरण प्रशासनाला चेतावणी दिली आहे की, येत्या १५ दिवसांत या सहाही तालुक्यांतील नवीन स्मार्ट मीटर काढून जुने मीटर पूर्ववत न केल्यास, शिवसेना (उद्धव बाळासाहेब ठाकरे) पक्षाच्या वतीने थेट रस्त्यावर उतरून तीव्र आंदोलन छेडण्यात येईल. या आंदोलनामुळे उद्भवणाऱ्या परिस्थितीला सर्वस्वी महावितरण कंपनीचा आलापल्ली विभाग जबाबदार राहील, असा इशाराही निवेदनातून देण्यात आला आहे.
स्मार्ट मीटरबाबत नागरिकांचे गंभीर आक्षेप:
निवेदनात महावितरणच्या कारभारावर आणि स्मार्ट मीटरच्या कार्यपद्धतीवर खालील प्रमुख मुद्दे उपस्थित करण्यात आले आहेत:
जुन्या मीटरच्या तुलनेत नवीन स्मार्ट मीटर बसविल्यापासून वीज बिलांमध्ये अनपेक्षित आणि मोठी वाढ झाल्याचे दिसून येत आहे.
रीडिंगबाबत संभ्रम: स्मार्ट मीटरच्या रीडिंग प्रक्रियेबाबत ग्राहकांमध्ये मोठ्या प्रमाणावर शंका आणि संशयाचे वातावरण निर्माण झाले आहे.
माहितीचा अभाव: या मीटरच्या नेमक्या कार्यपद्धतीबद्दल महावितरणकडून लोकांना कोणतीही समाधानकारक किंवा पुरेशी माहिती देण्यात आलेली नाही.
आर्थिक व मानसिक छळ: वाढीव आणि संशयास्पद बिलांमुळे सर्वसाधारण मध्यमवर्गीय नागरिक आणि गरीब शेतकऱ्यांना आर्थिक व मानसिक त्रासाला सामोरे जावे लागत असून, त्यांची उघड लूट होत आहे.या सर्व बाबींचा विचार करून प्रशासनाने जनतेच्या भावनेचा आदर करावा आणि सक्तीने लादलेले स्मार्ट मीटर त्वरित हटवावेत, अशी तीव्र मागणी आता शिवसेना पदाधिकाऱ्यांनी लावून धरली आहे.
