गडचिरोली:
1जून
राज्य सरकारच्या ‘मुख्यमंत्री माझी लाडकी बहीण’ योजनेतून संपूर्ण महाराष्ट्रात सुमारे ८० लाख महिलांना अपात्र ठरवण्यात आल्याची धक्कादायक माहिती समोर आली आहे. यावरून राष्ट्रवादी काँग्रेस (शरदचंद्र पवार) पक्षाच्या नेत्या तथा माजी जिल्हा परिषद अध्यक्ष भाग्यश्रीताई आत्राम (हलगेकर) यांनी महायुती सरकारवर अत्यंत बोचरी टीका केली आहे. “निवडणुकीपुरत्याच बहिणी लाडक्या होत्या का?” असा थेट सवाल करत त्यांनी सरकारच्या हेतूवर शंका उपस्थित केली आहे.
मतांसाठी महिलांचा वापर; निवडणुकीनंतर विश्वासघात!
प्रसिद्धी पत्रकाद्वारे आपली भूमिका मांडताना भाग्यश्रीताई आत्राम म्हणाल्या, “निवडणुकीपूर्वी ‘लाडकी बहीण’ योजनेचा प्रचंड गाजावाजा करण्यात आला. केवळ मतांचा फायदा घेण्यासाठी महिलांना खोटे आमिष दाखवून त्यांचा वापर करण्यात आला. आता निवडणूक संपताच त्याच लाडक्या बहिणींना वेगवेगळ्या जाचक निकषांचे कारण पुढे करून योजनेतून बाहेरचा रस्ता दाखवला जात आहे. हे सरकार दिलेला शब्द पाळणारे नसून, त्यांनी महाराष्ट्रातील महिलांचा मोठा विश्वासघात केला आहे.”
गडचिरोलीतील नेटवर्कच्या समस्येमुळे गरीब महिला वंचित
गडचिरोली जिल्ह्याच्या भौगोलिक परिस्थितीकडे लक्ष वेधताना त्यांनी सरकारला धारेवर धरले. “गडचिरोली हा अत्यंत दुर्गम आणि नक्षलग्रस्त जिल्हा आहे. येथील अनेक गावांमध्ये आजही मोबाईल नेटवर्कची साधी सुविधाही उपलब्ध नाही. अशा परिस्थितीत गरजू महिलांचे ई-केवायसी (e-KYC) आणि बँक खात्याशी ओळखपत्र लिंकिंग होऊ शकलेले नाही. केवळ तांत्रिक अडचणींमुळे पात्र महिलांना हक्काच्या लाभापासून वंचित ठेवणे हा त्यांच्यावर अत्यंत मोठा अन्याय आहे. जर भागात नेटवर्कच नसेल, तर गरीब महिलांनी केवायसी करायची कशी?” असा संतप्त सवाल त्यांनी केला.
ऑफलाइन केवायसी आणि मुदतवाढीची मागणी
दुर्गम भागातील महिलांना न्याय मिळवून देण्यासाठी भाग्यश्रीताई आत्राम यांनी सरकारकडे दोन महत्त्वाच्या मागण्या केल्या आहेत:
विशेष ऑफलाइन शिबिरे: इंटरनेट नेटवर्क नसलेल्या भागात प्रशासनाने स्वतः जाऊन विशेष शिबिरे आयोजित करावीत आणि महिलांची ऑफलाइन केवायसी प्रक्रिया पूर्ण करावी.
मुदतवाढ: तांत्रिक अडचणींचा सामना करणाऱ्या महिलांसाठी केवायसीची मुदत तातडीने वाढवून देण्यात यावी.
“कोणत्याही परिस्थितीत महाराष्ट्रातील आणि विशेषतः गडचिरोली जिल्ह्यातील प्रत्येक भगिनीला ‘लाडकी बहीण’ योजनेचा लाभ नियमितपणे मिळालाच पाहिजे, अन्यथा या अन्यायाविरोधात तीव्र आंदोलन छेडले जाईल.”
— भाग्यश्रीताई आत्राम (हलगेकर), माजी जि.प. अध्यक्ष
