अहेरी,11ऑक्टोबर:
सामाजिक आणि आर्थिक दुर्बलतेमुळे अनेक चांगल्या अनुभवांपासून वंचित असलेल्या अहेरी येथील भगवंतराव मागासवर्गीय मुलांच्या वस्तीगृहातील विद्यार्थ्यांसाठी एक अविस्मरणीय दिवस ठरला. स्थानिक सामाजिक कार्यकर्त्या शाहीन ताई यांच्या विशेष पुढाकारामुळे या सर्व विद्यार्थ्यांना शहरात आयोजित केलेल्या ‘मीना बाजार’चा मनमुराद आनंद घेता आला.
भगवंतराव वस्तीगृहात शिकणारे बहुतांश विद्यार्थी हे अतिशय हलाखीच्या परिस्थितीतून आलेले आहेत. परिणामी, शुल्क व खर्चाच्या कारणांमुळे त्यांना सांस्कृतिक व सामाजिक कार्यक्रमांना सहसा उपस्थित राहता येत नाही. अहेरीमध्ये नुकतेच भरवण्यात आलेले ‘मीना बाजार’ हे खाद्यपदार्थ, खेळणी, कलाकुसर आणि मनोरंजनाच्या साधनांचे एक मोठे आकर्षण होते. विद्यार्थ्यांच्या या वंचिततेची जाणीव ठेवून, शाहीन ताईंनी तात्काळ मीना बाजाराचे व्यवस्थापक श्री. समीर शेख (नांदेड) आणि अश्फाक भाई (नागपूर) यांच्याशी संपर्क साधला. त्यांच्या सहकार्याने वस्तीगृहातील सर्व विद्यार्थ्यांना बाजारात विनामूल्य विशेष प्रवेश मिळवण्यात शाहीन ताई यशस्वी ठरल्या.
‘पहिल्यांदाच असा अनुभव’ – विद्यार्थ्यांच्या भावना:
बाजाराच्या प्रवेशद्वारातून आत जाताच विद्यार्थ्यांच्या चेहऱ्यावरचा आनंद ओसंडून वाहत होता. मनोरंजनाची साधने, विविध स्टॉल्स आणि रंगीत झुले पाहून विद्यार्थी भारावून गेले. हा अनुभव त्यांच्यासाठी अत्यंत नवीन आणि महत्त्वाचा होता. “आम्हाला पहिल्यांदाच असा अनुभव आला, मीना बाजार म्हणजे काय असतो हे आम्ही प्रत्यक्ष पाहिले. आम्हाला खूप आनंद झाला आहे,” अशा शब्दांत विद्यार्थ्यांनी आपल्या भावना व्यक्त केल्या.
शाहीन ताईंच्या या सामाजिक जाणिवेचे सर्वत्र कौतुक होत आहे. गरजू विद्यार्थ्यांसाठी मदतीचा हात पुढे करणाऱ्या त्यांच्या या कृतीने वस्तीगृहातील मुलांच्या जीवनात आनंदाचे क्षण निर्माण केले आहेत.
