अहेरी:
मराठी नववर्षाचे स्वागत करण्यासाठी आज आलापल्ली येथे जगद्गुरु रामानंदाचार्य श्री स्वामी नरेंद्राचार्यजी महाराज (नाणीज धाम) यांच्या कृपाशीर्वादाने भव्य ‘गुढीपाडवा शोभायात्रा’ उत्साहात काढण्यात आली. पारंपारिक वेशभूषा, ढोल-ताशांचा गजर आणि विविध जिवंत देखाव्यांनी या मिरवणुकीने नागरिकांचे लक्ष वेधून घेतले.
भक्ती आणि संस्कृतीचा संगम
सकाळी ९ वाजता स्थानिक श्रीराम मंदिर येथून शोभायात्रेला प्रारंभ झाला. या यात्रेत १०० गुढ्याधारी महिला आणि १०८ कलशधारी महिलांनी सहभाग नोंदवून शिस्तबद्ध संचलन केले. यासोबतच पारंपारिक आदिवासी रेला नृत्य, वारकरी संप्रदायाचे भजन आणि लेझीम पथकाने मिरवणुकीत रंगत भरली.
आकर्षक देखावे आणि वेशभूषा
शोभायात्रेचे मुख्य आकर्षण ठरले ते प्रभू श्रीराम, लक्ष्मण, सीता मैय्या, हनुमान, छत्रपती शिवाजी महाराज आणि झाशीची राणी लक्ष्मीबाई यांचे जिवंत देखावे. याशिवाय रासलीला, गरबा आणि दांडिया नृत्याच्या सादरीकरणाने आलापल्लीची बाजारपेठ भक्तीमय झाली होती.
असा होता शोभायात्रेचा मार्ग
श्रीराम मंदिरापासून निघालेली ही मिरवणूक विरबाबुराव सडमेक चौक, एटापल्ली रोड, ग्लोबल मीडिया स्कूल, साईमंदिर रोड, बसस्थानक मार्ग, बजरंग चौक आणि सावरकर चौक यामार्गे मार्गक्रमण करत पुन्हा श्रीराम मंदिरात विसर्जित झाली. यानंतर भाविकांना महाप्रसादाचे वाटप करण्यात आले.
जनसमुदायाची मोठी उपस्थिती
या सोहळ्यासाठी आलापल्लीसह अहेरी, नागेपल्ली, सुभाषनगर आणि परिसरातील गावांतून भक्त सेवा मंडळाचे सदस्य व भाविक मोठ्या संख्येने उपस्थित होते. हा सोहळा यशस्वी करण्यासाठी श्रीराम व हनुमान मंदिर कमिटी, साईबाबा देवस्थान, व्यापारी संघटना आणि विविध सेवाभावी संस्थांनी मोलाचे सहकार्य केले.
