अहेरी/गडचिरोली:अहेरी नगरपंचायतीचे कर अधिकारी वैभव पांढरे यांच्यावर झालेल्या प्राणघातक हल्ला प्रकरणाला आता मोठे वळण मिळाले आहे. या प्रकरणातील मुख्य संशयित आणि माजी जिल्हा परिषद अध्यक्ष अजयभाऊ कंकडालवार यांना आज चामोर्शी न्यायालयात हजर केले असता, न्यायालयाने त्यांना MCR (न्यायालयीन कोठडी) सुनावली आहे. त्यानुसार त्यांची रवानगी थेट चंद्रपूर मध्यवर्ती कारागृहात (सेंट्रल जेल) करण्यात येत असल्याची खात्रीशीर माहिती सूत्रांनी दिली आहे.
तपासात मोठी प्रगती: हल्ल्याचे हत्यार जप्त, पोलीस कोठडी संपली
अजय कंकडालवार यांची पोलीस कोठडीची मुदत संपल्याने आज त्यांना न्यायालयात हजर करण्यात आले होते. पोलीस कोठडीच्या काळात तपास यंत्रणेने अत्यंत वेगाने चक्रे फिरवून अनेक महत्त्वाचे धागेदोरे हाती घेतले आहेत:
पोलिसांनी घटनास्थळाची बारकाईने पाहणी करून फॉरेन्सिक पुरावे गोळा केले आहेत.
तपासादरम्यान कर अधिकाऱ्यांवर हल्ला करण्यासाठी वापरण्यात आलेले संशयास्पद लाकूड पोलिसांनी जप्त केले आहे.
न्यायालयाचा निर्णय: दोन्ही बाजूंचा युक्तिवाद ऐकल्यानंतर न्यायालयाने कंकडालवार यांची रवानगी पुढील न्यायालयीन प्रक्रियेसाठी जेलमध्ये करण्याचे आदेश दिले.
फरार आरोपींचा शोध सुरू; संपूर्ण जिल्ह्याचे लक्ष तपासाकडे
अहेरीतील या हायप्रोफाईल आणि संवेदनशील प्रकरणामुळे संपूर्ण गडचिरोली जिल्ह्यात खळबळ उडाली आहे. अजय कंकडालवार यांना जेलची हवा लागली असली, तरी या गुन्ह्यातील इतर आरोपी अद्याप फरार आहेत. पोलीस दल वेगवेगळ्या पथकांद्वारे त्यांचा कसून शोध घेत आहे.या प्रकरणात दररोज नवनवे धक्कादायक तपशील समोर येत असल्याने, पोलिसांच्या पुढील कारवाईकडे आणि न्यायालयीन घडामोडींकडे संपूर्ण जिल्ह्याचे डोळे लागले आहेत.
